Diari Poetici Napoletani – ‘A cartullina ‘e Napule di Ciro Postiglione | 3

‘A cartullina ‘e Napule di Ciro Postiglione è una poesia in lingua napoletana che, con nostalgia, attraversa luoghi, memorie della città

di Ciro Postiglione

‘A cartullina ‘e Napule

 

Ogge nun tengo voglia  ‘e sbarià.

Me guarde attuorno e dico “C’aggia fà?”

P’ ‘o càvero nun pozzo riciatà.

Aggia truvà cocc’ ‘ata nuvità.

 

M’affaccio ‘a bbarcunata nu’ mumento:

ce sta ‘nu spicchio ‘e mare trasparente,

ca mmiez’ ‘o vverde  s’arrecrèa cuntento

‘ngrispato sott’ ‘o sole già cucente.

 

Luntana sta rurmenno Margellina.

Pusilleco addiruso è ‘nu ciardino

ca s’è miso a parlà cu’ San Martino,

scagnànnese ‘e prumesse ‘e ogni matina.

 

‘Na morra ‘e case antiche e puverelle

spase pe’ strade astrette e vecarielle

se move d’ ‘a Marina e ‘o Carmeniello

saglienno ‘ncopp’ ‘a cimma d’ ‘e Murtelle.

 

‘Nu bastimento carico ‘e penziere

‘a lassato ‘o silenzio d’ ‘o quartiere.

Mo’ nun saccio pe’ qualu mare va

cunnuliànno ‘o core ‘e ‘sta città.

 

‘Ncielo se sente ‘o strillo ‘e ‘nu gabbiano

ca vola attuorno commm’a ‘n’aeroplano,

me pare ‘nu guaglione smaniusiello

ca se sente già n’atu Masaniello.

 

Luntano l’orizzonte s’è ammiscato

cu’ l’onne ‘e chistu mare assunnacchiato.

Arrive fino a Capri e pare argiento

quanne accarezza Meta cu’ Surriento.

 

‘Ncap’ ‘o Vesuvio ‘o càvero e ‘o bafore

‘a ppriparato  ‘nu pennacchio ‘r’oro.

Chisà pecchè me pare ‘sta muntagna

‘nu gigante sperduto int’ ‘a campagna.

Quanne m’astregne forte ‘a nustalgia

me metto a sbarià cu’ ‘a fantasia:

veco Tuleto chino ‘e gente allèra,

‘o triato San Carlo e ‘a Galleria.

 

Me ne saglio pe’ ‘ncopp’‘a Sanità,

me fermo ‘a funtanella ‘e Capemonne,

luntane veco ‘a cchiesa ‘e Santa Chiara

ca m’allicorda ‘na canzona amara.

 

Si po’ voglio turnà pe’ n’ata via

penzo c’aggia passà pe’ via Furia.

Sotto Porta Capuana ancora sta

uno ca sta frienno ‘o baccalà.

 

Si arrivo addò sta ‘o vico d’ ‘e  Culonne,

me ne scengo pe’ dint’ ‘o Lavenaro.

Arrivo stancu muorto ‘o Campanaro,

m’assetto dint’ ‘a cchiesa e prejo ‘a Maronna.

 

Le dico: “Tu, curtesa Mamma Bruna,

arape ‘o core tuojo pe’ ‘sta città.

Nun vulimme patì senza alluccà

‘st’arraffa arraffa ‘e tutte ‘st’accattune”.

 

Passanno ‘ncopp’ ‘o ponte ‘a Matalena,

verenno San Gennaro m’assereno.

‘O ‘uardo e dico dint’ ‘o core mio:

“Gennà, pienzece tu p’ ‘a città mia”.

 

Una cartolina immaginaria di Napoli, disegnata con gli occhi di chi la guarda da lontano e con il cuore di chi la porta dentro. Ciro Postiglione attraversa mare, vicoli, quartieri e luoghi simbolo della città, intrecciando memoria, nostalgia e fantasia. E mentre Napoli scorre nei suoi versi, tra bellezza e malinconia, la poesia si chiude con un’invocazione semplice e profondamente napoletana: affidare a San Gennaro il destino della città.

 

Se ti fa piacere leggere altre mie poesie clicca su Diari Poetici napoletani

 

Ciro Postiglione, nato nel popoloso quartiere napoletano del Mercato, dove ha imparato ad amare il gustoso dialetto partenopeo, si è laureato col massimo dei voti presso la Federico II, discutendo una corposa tesi di letteratura greca cristiana.

Collaboratore del prof. Francesco Sbordone durante le sessioni d’esame di Letteratura greca presso lo stesso Ateneo, ha successivamente insegnato materie classiche in diversi licei di Napoli e provincia, per poi concludere la propria carriera come dirigente scolastico a San Giorgio a Cremano.

Oltre a numerosi articoli di critica letteraria, ha firmato anche diverse recensioni e prefazioni ad opere di narrativa.

Attualmente sta curando la traduzione in italiano moderno di alcuni libri di Storia romana dello scrittore greco Appiano di Alessandria.

Recentemente ha pubblicato per i tipi della Medusa editrice un libro di grammatica e civiltà latina per la Scuola media, dal titolo Caro amico, ti scrivo …